भोजपुर । Ramprasad Rai Rural Municipality ले युवालाई सरकारी सेवामा प्रवेश गर्न प्रोत्साहित गर्ने उद्देश्यले निःशुल्क लोक सेवा तथा शिक्षक सेवा आयोग तयारी कक्षा सञ्चालन गरेको छ।
गाउँपालिकाभित्र रहेका इच्छुक युवालाई लक्षित गरी ४५ दिने विशेष तयारी कक्षा सुरु गरिएको हो। स्थानीय तहबाटै लोक सेवा र शिक्षक सेवा सम्बन्धी सचेतना विस्तार गर्दै सक्षम र राष्ट्रप्रति उत्तरदायी जनशक्ति उत्पादन गर्ने लक्ष्यसहित कार्यक्रम अघि बढाइएको गाउँपालिकाका अध्यक्ष Tham Bahadur Rai ले जानकारी दिए।
उनका अनुसार बढ्दो बेरोजगारी समस्या न्यूनीकरण गर्दै युवालाई आत्मनिर्भर बनाउने उद्देश्यले कक्षा सञ्चालन गरिएको हो। “अध्ययनरत तथा आवश्यक योग्यता पुगेका विद्यार्थीलाई लक्षित गरेर लोक सेवा र शिक्षक सेवा तयारी कक्षा सञ्चालन गरिरहेका छौँ,” अध्यक्ष राईले भने, “यसले युवालाई सरकारी सेवामा प्रवेश गर्ने अवसर सिर्जना गर्ने विश्वास लिएका छौँ।”
आर्थिक रूपमा कमजोर तथा दुर्गम क्षेत्रका विद्यार्थीलाई विशेष लाभ पुग्ने अपेक्षासहित कक्षा सञ्चालन गरिएको हो। गाउँपालिकाबाट अध्ययनका लागि बाहिर गएका विद्यार्थीलाई प्राथमिकतामा राख्दै Bhojpur Multiple Campus परिसरमा कक्षा सञ्चालन भइरहेको छ।
हाल उक्त तयारी कक्षामा ५० विद्यार्थी सहभागी छन्। नियमित अध्यापन, नमूना प्रश्नपत्र अभ्यास, समूह छलफल तथा विषयगत मार्गदर्शनमार्फत तयारीलाई प्रभावकारी बनाइएको गाउँपालिकाले जनाएको छ।
गाउँपालिकाले आवश्यकता र उपलब्धिका आधारमा आगामी दिनमा यस्ता कार्यक्रमलाई निरन्तरता दिने योजना बनाएको छ। ग्रामीण क्षेत्रमा नै प्रतिस्पर्धात्मक परीक्षा तयारीको अवसर उपलब्ध भएपछि विद्यार्थी र अभिभावक उत्साहित भएका छन्।
