काठमाडौं । अमेरिकी राष्ट्रपति डोनाल्ड ट्रम्पले क्यानडाले चीनसँग व्यापार सम्झौता गरेमा क्यानेडियन सामानमा १०० प्रतिशत भन्सार शुल्क लगाउने धम्की दिएका छन्। उनले सामाजिक सञ्जाल ट्रुथ सोसलमार्फत यस्तो चेतावनी दिएका हुन्।
ट्रम्पले चीनसँगको सम्झौताले क्यानडालाई चिनियाँ सामान अमेरिका पठाउने ‘ड्रप अफ पोर्ट’ बनाउन सक्ने भन्दै त्यसो भए क्यानडाले ठूलो गल्ती गर्ने बताए। यद्यपि, उनले कुन विशिष्ट सम्झौताको कुरा गरेका हुन् भन्ने स्पष्ट छैन।
गत हप्ता क्यानडाका प्रधानमन्त्री मार्क कार्नीले चीनसँग रणनीतिक साझेदारीको घोषणा गर्दै केही भन्सार शुल्क घटाउने सहमति गरेका थिए। तर, डाभोसमा दिएको कार्नीको ‘अमेरिका नेतृत्वको विश्व व्यवस्था कमजोर हुँदै गएको’ भन्ने अभिव्यक्तिपछि दुई देशबीच तनाव चर्किएको देखिन्छ।
क्यानडाले भने चीनसँग कुनै मुक्त व्यापार सम्झौता नगरेको स्पष्ट पारेको छ। उता, चीनसँगको सहमतिअनुसार क्यानोला तेल र विद्युतीय सवारीसाधनमा लगाइएका भन्सार शुल्क घटाउने निर्णयलाई क्यानडाले ठूलो कूटनीतिक उपलब्धि मानेको छ।
